MHESHIMIWA RAIS JOHN POMBE MAGUFULI ASHIKA USUKANI KUIPAISHA TANZANIA ANGANI

magufuli1

  • Mheshimiwa Rais John Pombe Magufuli ameshika usukani kuongoza ujio wa ndege mpya ya taifa aina ya Boeing 787-8 Dreamliner iliyowasili leo jijini Dar es Salaam iliyotoka moja kwa moja mjini Seattle, Marekani

  • Katika hotuba yake, Mheshimiwa Rais Magufuli atambua uwepo wa viongozi mbalimbali waliohudhuria kwenye hafla ya kuipokea ndege hiyo na atambua kwamba itifaki imezingatiwa

  • Amshukuru Mwenyezi Mungu kwa kushuhudia tukio hilo la kihistoria. Kabla ya dakika chache kuwasili kwa ndege hiyo, amshukuru Mwenyezi Mungu kwa uwezo wake kuifikisha salama ndege hiyo kwenye anga za Tanzania na ataraji kuwa itawasili salama kwa dua zilizotangulizwa na viongozi wa dini

  • Mheshimiwa Rais Magufuli ameeleza kwamba ana imani kubwa na Watanzania kufurahia ujio wa ndege hiyo mpya na kwa wale ambao hawajafurahia watapata tabu sana. Amesema Mheshimiwa Rais Magufuli kwa tabasamu kubwa na huku akishangiliwa na wananchi ikiwa kama ishara ya kuungwa mkono kwa ujio wa ndege hiyo

  • Aishukuru Wizara ya Ujenzi na Mawasiliano kwa mualiko wao, na awashukuru wageni waalikwa na wananchi wote waliohudhuria na kujitokeza kwa wingi kwenye hafla hiyo ya kihistoria kwa kutambua kuwa tukio hilo ni kwa maendeleo ya taifa na ustawi wa taifa. Aishukuru kampuni ya Boeing kwa kutengeneza ndege ya Tanzania na ampa Kaimu Balozi wa Marekani afikishe salamu za shukran kwa uongozi wa kampuni ya Boeing, na awakumbushe ndege ya pili ya Boeing 787-8 Dreamliner ikamilishwe utengenezaji wake mapema na pesa ya ndege hiyo ipo tayari

  • Mheshimiwa Rais amewaeleza wananchi kuwa anayafanya yote haya ili kutimiza ahadi za ilani ya Chama Cha Mapinduzi ya mwaka 2015. Asema alipoingia madarakani, Air Tanzania ilikuwa ipo katika hali mbaya na ilikuwa ina ndege moja tu, ambayo nayo ilikuwa inashinda kwenye karakana kwa ajili ya kufanyiwa matengenezo ya mara kwa mara

  • Asema ameamua kufanya maamuzi ya kufufua shirika la ndege kwa kununua ndege mpya saba kwa pesa taslim. Kati ya ndege hizo saba, tatu ni Bombardier Q400 (zimeshawasili) ambazo zinabeba watu 76, ndege ya nne ni Boeing 787-8 Dreamliner (imewasili leo) ambayo inabeba watu 262, ndege nyingine mbili ni Bombardier CS300 (zitawasili Novemba 2018) ambazo zinabeba watu 130, na ndege ya saba ni Boeing 787-8 Dreamliner (inatarajiwa kuwasili 2020) ili iweze kufanya kazi na ndege nyingine ya Boeing 787-8 Dreamliner iliyowasili leo ili kuendeleza ubebaji wa abiria

  • Aainisha kwamba mafanikio haya ni jitihada za Watanzania wanaolipa kodi na kufanya kazi kwa bidii, na achukua fursa hiyo kuwashukuru na kuwapongeza Watanzania wote kwa kuendelea kujituma katika kuchapa kazi na awapa hongera sana

  • Aainisha kwamba bila ya kulipa kodi na kuchapa kazi, uamuzi wa ndege saba kwa mpigo kwa pesa taslimu za ndani ingekuwa ni ndoto. Na hivyo, awashukuru Watanzania wote ambao wanashiriki kikamilifu kwa upatikanaji wa ndege hizi saba na katika kushiriki kikamilifu katika maendeleo mbalimbali ya kulijenga taifa, na awapa hongera na huo ni uthibitisho kwamba Watanzania wakiamua wanaweza, alisema Mheshimiwa Rais Magufuli

  • Aishukuru kamati ya bunge na bunge zima kwa kuridhia kununuliwa kwa ndege hizo na awashukuru wanavyounga mkono mipango mbalimbali ya serikali na aiomba kamati ifikishe shukran kwa waheshimiwa wabunge wote

  • Aelezea sababu kuu tatu za kufufua ndege za taifa: kwanza ni kulinda heshima na hadhi ya taifa letu, pili kuimarisha na kuboresha huduma za usafiri wa anga. Asisitiza Watanzania wanahitaji usafiri wa ndege ili kujiinua kiuchumi kwa kusafiri wao wenyewe na kusafirisha mazao yao, vilevile kuboresha huduma za usafiri wa anga kwa kutanua mtandano wa safari nchini na kuweka bei nafuu. Mfano, bei ya usafiri wa ndege kwenda Bukoba ilikuwa milioni moja lakini sasa ni laki nne, pia imesaidia kusukuma idadi ya abiria kuongezeka kutoka abiria elfu nne na mia saba kwa mwezi lakini sasa abiria elfu ishirini na moja kwa mwezi, na kutoka viwanja vitatu mpaka sasa kufikia safari za viwanja vya ndege kumi na mbili. Sababu ya tatu ni kukuza sekta ya utalii kutokana na idadi ndogo ya watalii wanaoingia nchini

  • Aainisha kwamba mwaka jana, walikuja watalii milioni 1.3 nchini. Lakini nchi zingine ambazo zina ndege zao za taifa wamepokea watalii wengi. Mheshimiwa Rais amesema kutokana na utafiti, nchi ya Misri hupokea watalii milioni 10.1 kwa mwaka, Morocco watallii milioni 12 kwa mwaka, na Afrika Kusini hupokea watalii milioni 10.29 kwa mwaka, na hata Kenya wametuzidi kwa idadi ya watalii, amesema Mheshimiwa Rais Magufuli

  • Aainisha kutokana na utafiti (2017), watalii bilioni 1.3 wamefanya safari za kitalii duniani, na katika hao, asilimia 70% wametumia usafiri wa ndege na ndiyo sababu iliyosukuma kununua ndege kubwa ili kuleta watalii wengi nchini na hatimaye kuongeza idadi ya watalii maradufu

  • Aeleza kwamba azma na dhamira ni kuleta maendeleo kwa nchi na atolea mifano mbalimbali ya miradi ya maendeleo inayoendelea nchini ikiwemo upanuzi wa bandari ya Dar es Salaam, Tanga na Mtwara, na kuboresha utendaji wa kazi na wateja wazidi kuongezeka kutoka nchi jirani

  • Aelezea ujenzi wa reli mpya ya kisasa (SGR) ya kutoka Dar es Salaam-Morogoro-Dodoma, na ukarabati wa reli ya zamani ukiwemo ukarabati wa kipande cha kutoka Tanga mpaka Arusha ambacho kinatarajiwa kukamilika mwaka huu 2018. Yote haya yanafanyika ili kuijenga Tanzania mpya, Tanzania yenye uchumi, Tanzania yenye maendeleo

  • Aelezea ujenzi wa barabara unaoendelea nchini zikiwemo barabara za jijini Dar es Salaam na barabara ya juu ya TAZARA ambayo inajulikana kama daraja la Mfugale ambalo linaelekea kukamilika mwaka huu. Barabara zingine za juu ikiwemo Kijitonyama, Makumbusho, Sinza, Tandale, Kwa Mtogole, na barabara ya juu ya Ubungo

  • Miradi mingine ikiwemo miradi ya umeme kama mradi wa Kinyerezi 1, Kinyerezi 2, na Kinyerezi 3, mradi wa REA wa awamu ya tatu, na mradi wa umeme wa mto Rufiji (Steigler’s Gorge). Vilevile, miradi ya maji ambayo imepokea mikopo kutoka India na Benki ya Dunia, na mradi wa bwawa la Kidunda ambao ni mradi ulioasisiwa na baba wa taifa, Mwalimu Nyerere, ambao ni muhimu sana kwa jiji la Dar es Salaam, amesema Mheshimiwa Rais Magufuli

  • Akaendelea kuelezea miradi mingine kama mradi wa hospitali za wilaya, miundombinu ya elimu ikiwemo mabweni, maabara, maktaba, na kadhalika. Awashukuru wananchi kwa kufurahia ujio wa ndege mpya ya taifa na atoa wito kwa bodi na wafanyakazi wa Air Tanzania (ATCL) kuendelea kufanya kazi kwa bidii kwa kuwa serikali imetumia pesa za Watanzania na kwa hiyo wasiwaangushe

  • Awapongeza ATCL kwa mafanikio yaliyofanyika kupiga vita rushwa, ufisadi, na awataka waendelee kujituma na kuimarisha nidhamu ya kazi na kuwa wabunifu, na kujiimarisha kitaaluma na kitaalamu hususan kwenye ufundi wa ndege

  • Mwisho awahakikishia Watanzania kwamba serikali iliyopo madarakani itaendelea kuangalia maslahi ya Watanzania wote na hasa maskini, na awaomba Watanzania waendelee kumuunga mkono katika kuijenga Tanzania mpya, Tanzania yenye sifa, Tanzania yenye maendeleo, Tanzania yenye umoja inakuja, amesema Mheshimiwa Rais Magufuli. Asema pamoja na haya, lakini wapinga maendeleo wachache hawakosi. Awaomba Watanzania kushikamana na kuwa wamoja. Aibariki ndege mpya ya Boeing Dreamliner 787-8, ndege zote za ATCL na aibariki Tanzania na watu wake